Եվա Միքայելյան

Մարդու վարքն ու մտածելակերպը հաճախ կախված են այն ժամանակից և միջավայրից, որտեղ նա ապրում է։ Տարբեր պայմաններում մարդիկ կարող են փոխվել՝ դառնալով կամ ավելի ուժեղ, կամ ավելի թույլ։ Այդ պատճառով կարևոր է հասկանալ, թե ինչպիսի ազդեցություն ունեն շրջապատն ու ժամանակաշրջանը մարդու վրա։

Ժամանակաշրջանն ու միջավայրը մեծ ազդեցություն ունեն մարդու բարոյական հատկանիշների վրա, իսկ պետական գործիչը պետք է ունենա բարձր պատասխանատվություն, ազնվություն և հայրենասիրություն՝ երկրի զարգացման համար։

Տեքստում ներկայացված քաղաքային միջավայրը արտաքինից թվում է զարգացած, կազմակերպված և հիասքանչ․ այնտեղ կան համալսարաններ, գիտական կենտրոններ, թատրոններ և մշակութային կառույցներ։ Սակայն այս արտաքին զարգացվածության մեջ նկատվում է նաև գաղափարական խառնաշփոթ՝ մարդիկ տարբեր կերպ են հասկանում նպատակներին հասնելու ճանապարհները, ինչը ցույց է տալիս, որ բարձր զարգացած միջավայրը դեռ չի երաշխավորում միասնական բարոյական համակարգ։ Սա ապացուցում է, որ ժամանակաշրջանը կարող է մարդուն տալ թե՛ հնարավորություն զարգանալու, թե՛ շփոթության մեջ ընկնելու։

Պատմական հատվածում Արամ Մանուկյանի կերպարը ցույց է տալիս, թե ինչպես է ծանր ժամանակաշրջանը ձևավորում ուժեղ բարոյական անձնավորություն։ Պատերազմի և պետականության կերտման պայմաններում նա դրսևորում է պատասխանատվություն, նվիրում և կազմակերպչական բարձր կարողություններ։ Նրա գործունեությունից կարելի է եզրակացնել, որ պետական գործիչը պետք է ունենա արդարություն, հայրենասիրություն, վճռականություն և անձնական շահից վեր հասարակական շահը դնելու կարողություն։ Առանց այդ հատկանիշների հնարավոր չէ ղեկավարել երկիրը դժվարագույն իրավիճակներում։

Եթե պատկերացնենք իմ երազանքի Հայաստանը, ապա դա կլինի մի պետություն, որտեղ օրենքը գործում է բոլորի համար հավասար, մարդիկ վստահում են պետական կառույցներին, իսկ ղեկավարները առաջնորդվում են արդարությամբ և պատասխանատվությամբ։ Դա կլինի կրթված, խաղաղ և անընդհատ զարգացող երկիր, որտեղ յուրաքանչյուր քաղաքացի իրեն զգում է պաշտպանված։ Նման Հայաստանը հնարավոր է միայն այն դեպքում, երբ հասարակությունն ու պետական գործիչները միասին պահպանեն բարձր բարոյական արժեքներ։

Այսպիսով` ժամանակաշրջանը և միջավայրը մեծ դեր ունեն մարդու ձևավորման մեջ, իսկ ճիշտ արժեքներ ունեցող անհատները կարող են փոխել պատմությունը և կառուցել ուժեղ պետություն։